الاجتماع الي ما بيطلع منه قرار

زملاؤك أو زبائنك اللي بيحترموا وقتك بيستحقوا مكانة مختلفة وأولوية خاصة دايمًا.

بشغلي مع أكثر من شركة وعلى أكثر من مشروع وستارتب، من أصعب الأمور عليّ كان أفوت على اجتماع فيه كتير حكي وما فيه زبدة. مجرد دردشة وسيناريوهات وافتراضات ما إلها علاقة بالشغلة الي عم نشتغل عليها.

وكنت دايمًا أفترض إن المشكلة مني، إني بفقد التركيز وبتشتّت. بس مع الوقت اكتشفت إن في فئة كبيرة بتحب تحكي وما بتحب تشتغل، وبتعتبر وقت الاجتماع وقت ممكن “ينسرق” من الشغل، أو وقت يستغله صاحب المشروع ليحكي للفريلانسر عن طموحاته حتى لو كانت غير واقعية.

أكيد ما بعمّم. بس قبل ما نطلب اجتماع لازم نكون فاهمين هدفه، وهل الموضوع بيستحق اجتماع أصلاً، وهل في طريقة أوفر تجيب المعلومة بدون اجتماع طويل.

ثمانية قواعد

١. إذا كنت فريلانسر، احسب وقت الاجتماع من ساعات شغلك. وقتك مش ببلاش، وخبرتك كمان.

٢. استعمل أدوات بدل الاجتماع. Loom وأمثاله من أسهل الطرق لأخذ الريكوايرمنت أو البريف أو حتى لشرح شغلة.

٣. حط خطوط حمراء. ما تسمح لحدا يضيّع وقتك، وكن صارم بهاد الموضوع.

٤. قبل ما تفوت، اعرف دورك. شو الشغلة الي بدك تشتغل عليها تحديدًا، مش عنوان عام.

٥. وقت راحتك له نفس قيمة وقت الشغل. بدون صفاء ذهن واستقرار، مش رح تقدر تشتغل.

٦. أي اجتماع فيه أكثر من ٤-٥ أشخاص غالبًا ما بيطلع منه نتيجة واضحة. خلّص الموضوع مع ٣ أو ٤ بالكثير، وخلي الاجتماع الكبير للإعلان بس، ولا يتعدى ١٥ دقيقة.

٧. والأهم: خلّص شغلك. الاجتماع لازم يطلع منه قرار. الاجتماع الي ما بيطلع منه قرار هو اجتماع فاشل.

٨. لخّص الاجتماع وابعت التلخيص. حاليًا في أدوات كثيرة بتعمل هاد بفضل الذكاء الاصطناعي.

قلّت اجتماعاتكم، وكثرت أعمالكم.